ગીત: મહાસફાઈ

મનની કરી લે સફાઈ મુસાફિર મનની કરી લે સફાઈ

પળમાં આવ્યા પળમાં જવાનું ગીત મજાનું ગાઈ

મુસાફિર મનની કરી લે સફાઈ

બારી, બારણાં હ્રદયનાં ખોલી પોતું પ્રેમનું લગાવો,

તણખે તણખું દુર્ગુણોનું વીણી વીણી સળગાવો.

મન ચોખ્ખું તો તન ચોખ્ખું થવાનું મારા ભાઈ,

મુસાફિર મનની કરી લે સફાઈ.

હાથમાં ઊભું ઝાડું પકડ્યું, સાવરણી કેવી સુવાળી,

શેતરંજી ખડખડાટ હસતી, કલ્પના મારી નિરાળી.

પ્રાર્થનાના શબ્દે શબ્દે થઈ સ્નેહની સગાઈ

મુસાફિર મનની કરી લે સફાઈ

શિક્ષણ સાથે કેળવણી આપે જીવન ઘડતર કરવા,

સમૂહ જીવન જીવતાં શીખવે એકબીજાને સમજવા.

વિદ્યાપીઠ કરાવે આજે કરી લે મહાસફાઈ

મુસાફિર મનની કરી લે સફાઈ

                                                                        ~ વિજય ચલાદરી